Elstarigita

Saluton, kunfaremulo!

Esperanta Kunfarejo

Bonvenon al la Esperanta Kunfarejo. Tio ne nur estas listo de anoncetoj por kunfarado. Vi estas invitita fosi pri eblecoj kunfari. Ne temas pri aferoj, kiuj estis, sed pri komunaj aferoj, kiuj estas, estos kaj estu.

Por serĉkadreto vidu sube. Vi povas sekvi la retejon sen malfermi konton. Por fariĝi aŭtoro = mem inskribi vian proponon pri kunfarado, petu konton de la administranto. La plej ofta maniero publikigi ion estas peti afiŝon de administranto.

Bonvolu skribi mesaĝon, se vi bezonas ian helpon. Listo de la ĝisnunaj aŭtoroj: ArFrançoiseFrali (admin Frank Merla) ⋆ HermanRenatoYanpetro

Frank Merla malfermis telegram-grupon kaj retpoŝtgrupon. Li reaktivigis facebook.com/maklerejo/. Povas okazi, ke tie aperas kunfarproponoj sen spuroj en tiu ĉi retejo. Unuopaj anoncetoj de la Esperanta Kunfarejo aperas ankaŭ en soc.culture.esperantonubo.relinkedinreddittwittermediuminstagramxing

Okaze de plaĉo ne forgesu instigi viajn konatojn kunfari en la kunfarejo. Tio jam estus kunfaro en/por ni en la Esperanta Kunfarejo!

Legu pli

Nova Strategia Laborplano de UEA

Ekzistas Strategia Laborplano de UEA kaj Emilio Cid invitas kontribui al nova plano:

Laŭ peto de la Estraro mi invitas vin kunlabori por la kreado de nova Strategia Laborplano. Ekde 2013 la mondo multe ŝanĝiĝis, do endas krei novajn gvidliniojn kaj celojn por UEA. Indas konsulti la malnovan Strategian Laborplanon de UEA 2013-2017 ĉe https://uea.org/strategio por kontroli tion, kio estis jam realigita kaj kio estos realigenda.

Pro tio, ke temas pri kunlabora verkado de ampleksa dokumento kaj por pli bone organizi kaj taksi plurajn venontajn proponojn, mi invitas vin aldoni ideojn al nia forumo en la kategorio “Strategia laborplano” https://forumo.uea.org/forumo/70-strategia-laborplano/.

En ĉi tiu kategorio “Strategia laborplano” vi klaku sur la ruĝa butono [Lanĉi novan temon] por aldoni vian proponon.

Se vi spertos malfacilaĵojn por retrovi vian registriĝon en la forumo aŭ por afiŝi proponon aŭ komenton ne hezitu peti mian helpon. Se vi preferas ne rekte partopreni en la forumo, sendu vian proponon al mia retadreso por ke mi afiŝu ĝin en la forumon.

Dankon pro la partopreno,

Emilio Cid (cid.emilio{ĉe}gmail.com)
Komitatano B de UEA

Traduki de Esperanto al via regata lingvo

Ni, kiuj en Hungario zorgas pri la heredaĵoj de János Rózsás, ŝatus havi tradukojn en pliaj lingvoj de lia teksto (maks. 3 paĝoj en formato A4), en kiu temas pri lia 21-a naskiĝtago en GULAG, tiu kruela loko en kiu li travivis grandajn suferojn kune kun milionoj da homoj.

TRADUKPETO: Ĉu vi pretas traduki al via regata lingvo ĉi tiun tekston? Mi jam havas tradukojn en 10 lingvoj, do bonvolu indiki la tradukotan lingvon. Dankon.
Se vi jesos, mi sendos al vi la tekston; bonvolu mendi per mia retpoŝtadreso nktibszab{ĉe}outlook.hu. Dankon pro via bonintenco.
Salutojn el Hungario, Tibor J. Szabadi

Rete paroli kun esperantistoj

deziras Walter Jakowski – komencinto kaj praktikemulo pri Esperanto – pri diversaj temoj, ĉefe pri alternativa (verda) tekniko, ekovilaĝoj kaj komuna Esperantoloĝado en Germanio aŭ Eŭropo, vojaĝado, geokaŝado. Li ŝatas scii pli pri filmado, politikaj, socioligaj, lingvaj kaj filozofaj aferoj. Skribu al li per wj-iz{ĉe}online.de kaj vi povos komuniki kun li per telefono, Skype, CB TALK, Facebook-mesaĝilo kaj Mumble.

Amikumu iĝos pli malferma

Jen 8 facilaj manieroj por montri vian subtenon kaj helpi kreskigi nian komunumon. amikumu.com/eo/support-us/

Oni celas havi 500 pliajn orajn membrojn dum la kampanjo en aŭgusto. Normale kostas 30 eŭrojn jare por esti ora membro, sed dum la kampanjo oni povas aliĝi kun dekprocenta rabato, do 27€ jare, se oni faras tion en la retpaĝo de la kampanjo. Cetere eblas vidi kiom da membroj parolas kiujn ligvojn, kaj je kiu nivelo, en la statistiko. Legu pli en liberafolio.org.

Scivolemo

Scienca blogo en Esperanto: scivolemo.wordpress.com

Esperanto estas kreskanta lingvo kun multe da potenco, sed kvankam ĝi floras kiam temas pri socia agado aŭ lingvaj debatoj, scienco estas tereno, kiu ne sufiĉe estas esplorata. Kiel paŝo en la ĝusta direkto, ĉi tiu kanalo komenciĝis per videigo de artikoloj de la blogo Scivolemo.
Tiel la celo unua estas diversigi la materion, kiun la lingvo povas oferti. Nuntempe ni estas Frank, Karlos’, Stefan kaj Siru, sed tio ne signifas ke nia teamo plenas. Ni daŭre serĉas samideanojn kiuj emas helpi per iliaj lertecoj. Ĉu vi volas? Kontaktu nin!
Ni estas profesie nek sciencistoj nek filmistoj. Tio signifas ke kritikoj kaj sugestoj ĉiam estas bonvenaj.

Peti aldoni Esperanton al Empatico

Karaj samideanoj,

bonvolu verki mallongan peton ke Empatico aldonu Esperanton al la lingvoj por infanoj komuniki per sia portalo. La retadreso estas support{ĉe}empatico.org.

Ne gravas kiun lingvon vi uzu, se Anglalingvano aŭ Hispanlingvano povus kompreni ke vi petas pri Esperanto.

Empatico traktis nian unuan peton sufiĉe serioze ke ĝi nomis reprezentanton negocigi, sed ŝi ŝajne iom prokrastas… eble utilos se multaj petoj pri Esperanto aperas.

Se vi estas instruisto aŭ lernanto, aŭ instruanto, bv menciu tion. Se ne, vi ankoraŭ rajtas peti ke Esperanto estu uzebla kiel lernantamika kanalo por tutmonda amikeco en Empatico.

Bonvole disdonu tiun ĉi peton laŭ viaj Esperantistaj kanaloj, por ke ni montru nian veran homforton kaj geografian disvastigon.

Elkoran dankon pro via kunlaborado,

Penny Penelope Vos

Kiam vi estis plej feliĉa en la vivo?

En junio 2020 aperis numero (297) de la revuo Kontakto, de Tutmonda Esperantista Junulara Organizo. Tie aperis invito de la redaktoro (la brazilano Rogener Pavinski), ke oni faru omaĝon al Júlia Sigmond. Nome, li proponas relanĉon de la rubriko pri feliĉo: oni skribu al la revuo kaj raportu pri sia momento de feliĉo en la vivo.
Legu pli: twitter.com/revuokontakto/status/1278766659071770630, www.instagram.com/p/CCJozTQgFvd/?igshid=woqkz6c2m7ga kaj www.facebook.com/revuokontakto/photos/a.311224762243580/3381432225222803.

plenigi enketon en la paĝoj de UN en Esperanto

La nombro de aliĝoj al la grupo en Facebook [UN75 en Esperanto] kaj la nombro de reagintoj al la enketilo en la paĝoj de UN en Esperanto estas krize malaltaj. Se vi volas ke la oficistoj de UN pensu, ke Esperanto estas io atentinda, bonvolu aliĝi al listo en Facebook kaj respondi al la enketilo.

De: Tonkin, Humphrey <tonkin{ĉe}hartford.edu>
Jon Liechty, kiu kunordigas la respondon de la Esperanto-movado al la enketo pri UN-75, lanĉis fejsbuk-paĝon “UN75 en Esperanto”. Bonvolu nepre aliĝi al ĝi kaj kontribui komentojn (Jon kolektas ilin kaj plusendas ilin al UN), kaj konvinki aliajn homojn samon fari. Homoj el pli ol 50 landoj jam aliĝis, sed la nombro malaltas. Esperanto estas inter la lingvoj per kiuj oni povas plenigi la enketon. Nepre faru!: https://un75.online/?lang=epo
Humphrey Tonkin
Representative of the Universal Esperanto Association to the United Nations